حاجات مدارية

حاجات مدارية
فى حاجات تلاقيها كده مدارية محدش ياخد باله منها ، على الرغم من قيمته العالية
والاصيلة بس للأسف ضايعة فى وسط اللخبطة والهبل الى بنشوفه حوالين
وأقصد بالكلام ده كتير من الأعمال الفنية سواء أفلام أو مسرحيات أو أغانى ....
خد مثلا عندك :
( 1 ) وجيه عزيز : مطرب وملحن من أحلى الأصوات وكمان ألحانه جامده والكلام اللى بيغنيه يمس قلبك وتحس إنه حقيقى بيعبر عن أحاسيسك المختلفة وأنت فرحان وأنت متضايق وأنت حيران ...وحقولك أمثلة من أعماله :
- فاكر الأغنية اللى غناها أحمد زكى ( الله يرحمه ) فى فيلم هستيريا ( لو مش قادر تضحك ) ده من ألحانه وكمان أغنية من أول لمسة لمحمد منير ده غاير إنه ليه البومات
يمكن صحيح مش مشهورة بسبب قلة الدعاية بس أغانيها أكتر من رائعة زى أغتية
( زعلان شويه - عيرة ) جرب واسمعه صدقنى مش حتندم .
( 2 ) فيلم اسمه ( موعد مع الشيطان ) لزكى رستم ومحمود المليجى برضه لو لقيته معروض على أى قناة فضائية شوفه صدقنى مش حتندم .
( 3 ) أكيد شفت فيلم كتيبة الإعدام ،أول ما تلاقى تتر المقدمة اسمع الاغنية اللى كتابها عمنا سيد حجاب وغناها عمار الشريعى والمجموعة وبرضه مش حتندم .
( 4 ) بتحب الممثل اللى اسمه عادل خيرى ابن بديع خيرى ، لو ما بتحبوش أتفرج على
فيلم ليه اسمه ( لقمة العيش ) حتحبه من قلبك ( على فكرة ما عملش غير 3 أفلام )
( 5 ) فاكر مسلسل رحلة السيد أبو العلا البشرى ، أكيد فاكره اسمع أغنية المقدمة
واللى كتبها الجامد ( أحمد فؤاد نجم ) وغناها مدحت صالح صدقنى حتعجبك .
( 6 ) برضه فاكر مسلسل ( أنا وأنت وبابا فى المشمش ) فى أخر حلقة فى أغنية رهيبة اسمها ( بلدى ) وكمان مين اللى بيغنيها فردوس عبد الحميد ومحمود الجندى وعلى فكرة برضه من تأليف الجامد ( أحمد فؤاد نجم ) وتلحين عمار الشريعى .
* وغير كل ده فى حاجات كتير مدارية و جميلة تستاهل إنك تدور عليها وتستمع بيها
**** جرب مش حتندم ...صدقنى

افتح قلبك

فتح قلبك للدنيا
حتلاقى الكون حاجة تانية
والفرحة تملى تجيلك
وتعيشها ثانية بثانية
***************
تفرح لما الناس تفرح
وإياك تكدب أو تجرح
والفرصة دى لسه فى إيدك
فاليأس أوعاك ليه تسمح
****************
ما تفكرش ف يوم عدى
وارسم على خدك وردة
واهديها للى يعاتبك
تزرع ف القلب مودة

فيها إيه

فيــــها إيـــــــه

فيها إيه لو يعشق قلبى ويعرف إنى بفكر فيه
فيها لو قرب منى وجرب شوقى وطول لياليه
لو مرة ينادى عليا وقلبى يرد يقوله شارييه
أو يسهر ليلة من لياليا يفكر ف اللى نسيه
************************
يا حبيبى أنا فلبى بيعشق قلبك وانت كمان مشتاق
مشتاق لحبيب يحس بحبك ويطفى الاشواق
يوهبلك عمره وكل حياته وما يعرفش فراق
***************************
يا حبيبى أنا عارف إنك حاسس حبى وشوقى إليك
ما تطاوع حبك واسأل قلبك ..دور ع اللى شاريك
دا أنا كل ما احاول أبعد عنك أرجع أقرب ليك
***************************

شوف لما يغضب ربنا

شوف لما يغضب ربنا

شوف لما يغضب ربنا ........ يخــلى فوقـــنا تحـتــــنا

وف كل نيبة يدبنـــــــا ........ من بعد ما يصيبنا العمى

ندور نضبش فى الظلام .... ...واللى ورا يصــبح قـــدام

ونحــلل الشىء الحـرام ........ بتـــشريعــــات ومحكمة

لما تتــــهز الخــصـــور ..... ..والكاس ع النسوان يدور

يا نور تخاف منك يا نور .......كــل القــلوب المظلــــمة

إيها الشعب المصرى السميع ...اسمع ما شئت .... بس ما تصدعش دماغ أمنا
فى الحقيقة لو أى أجنبى زار مصر ، أكيد حيقول إن الشعب المصرى ده شعب مثقف مرهف الإحساس ...وده بقى ليه
طبعا من كتر ما حيشوف الناس اللى فى الشارع وهى عمالة بتسمع فى أغانى فى كل مكان وفى كل وقت وعلى مدار 24ساعة
لكن طبعا الحقيقة غير كده ، بل هى عكس كده تماما .
فالشعب المصرى لا يجيد إلا استخدام التكنولوجيا والمخترعات الحديثة فى أسوأ صوارها .
بمعنى كل واحد يجيب أحدث موبايل ( وفى أغلب الأحيان بالتقسيط أو يكون مستعمل استعمال طبيب ) بس المهم يكون فيه mp3
عشان بقى يحمل أغانى ويعيش .... بس للأسف ما بيعيشى مع الأغانى اللى بيسمعها لوحده ...أمال إيه ؟
لازم تسمع معاه الأغانى غصب واقتدار .. وطبعا حسب ذوقه اللى فى الغالب بيكون مهبب ( العنب ، الست لما ، سجارة بنى ...)
وحتى لو بيسمع أغانى لمطربين معروفين وليهم جمهور ..برضه لازم يخليك تشاركه فى السمع غصبن عنك دون مراعاة لظروف
وده ليه لأن معظم المصريين ما يعرفش يسمع الاغانى إلا وهيه على أخر درجة من الفوليم على اساس إن ده حرية شخصية
طب أنا حقولوكوا على حكاية بتحصللى تقريبا كل يوم .. أنا يا سيدى زى معظم المصريين بركب الميكروباص وطبعا دى لوحدها حاجة
تعكنن على أجدع مزجانجى ..ما علينا الساعة لسه ما جتش 7 وعمنا السواق قاعد جنبه واحد صاحبه والكاسيت عالى وتلاقيه بيتكلم مع صاحبه وكمان بينادى على الزباين وكمان بياخد الآجرة من الناس اللى راكبة والأفكس من كده تلاقيه بيسمع أغنية ( الست لما أو العنب باصدارتها المتعددة أو سيجارة بنى أو صحيت من نومى فجأة او المولد او غيرها من الأغانى اللى بترفع الضغط )
ولو قلت له يا عم صباحك فل وطى شوية ..يقولك : مش عجبك انزل يا برنس .
وطبعا أكيد حيعجبك لأنك عايز تروح شغللك .
سيب الميكروباص واركب المترو ... يدخل مجموعة من شباب الجامعة ولاد وبنات وطبعا كل عيل خوروبق عايزيعمللك فيها رومانسى
يروح مشغل التليفون على mp3ويعد يتكلم من زميلته وكأن الحياة لا تعاش بغير الأغانى ليل أو نهار أو حتى وأنت نايم .
وغيره وغيره وغيره وهكذا نظل محاصرين طول الوقت بين أغانى يسمعها الآخرون بس يا خسارة بيسمعوها بصوت عالى
وأنت مجبر على مشاركتهم فى سماعها بالعافية
ولذلك نداء إلى كل مواطنى مصر أسمع اللى يعجبك وفى أى وقت بس لنفسك وبلاش تفرض ذوقك الرخم عادة على الآخرين
دا أنـــــــــت عــــــــــيـل رخــــــــــــــــم صحيـــــــــــــح

افتتاحية المدونة

صباح الخير أو مساء الخير حسب ظروفك مع المدونة
المهم ... أنا يا سيدى عامل المدونة ده عشان اتكلم براحتى مع نفسى وكمان معاك لو تحب تشاركنى
ولو سألتنى عن سبب تسمية المدونة خوروبق .؛ حاقولك
أولا : ده اسمه بيعبر عن حال شباب كتير فى الزمن ده و معناه ...
واحد بيتكلم كتير عن حاجات إما ما عملهاش أو ما يقدرش يعملها
يعنى باختصار بق ع الفاضى .
وأنا من موقعى هذا ...أوجه حديثى إلى كل شاب وشابة نفسه يتكلم كلام يقدر على فعله ...
سيبك يقى من التسمية وركز معايا شوية
يمكن تضحك شوية أو تتأثر وتبكى شوية أو حتى تندم كتير المهم إنك تبقى معايا
لأن التواصل بين الناس أصبح صعب ...